عمران نيازي جي ڪرپشن جا رڪارڊ عوام آڏو اچي رهيا آهن، ٻين تي الزام هڻندڙ عمران نيازي پاڻ ڪوڙو، چور ۽ سازشي آهي: مريم اورنگزيب

APP38-080522 LAHORE: May 08 - Federal Minister for Information and Broadcasting, Marriyum Aurangzeb addressing during Meet the Press programme at Press Club. APP photo by Rana Imran

لاهور – 08 – مئي (اي پي پي) اطلاعات ۽ نشريات واري وفاقي وزير مريم اورنگزيب چيو آهي ته عمران نيازي جي ڪرپشن جا رڪارڊ عوام آڏو اچي رهيا آهن، ٻين تي الزام هڻندڙ عمران نيازي پاڻ ڪوڙو، چور ۽ سازشي آهي، عمران نيازي جي قيادت ۾ مافيا عوام کي چار سال ڦريندي رهي، اڳوڻي دور ۾ مهانگائي، قرضن ۽ معاشي زبون حالي جا تاريخي رڪارڊ بڻيا، 60 لک ماڻهو بيروزگار ٿيا، 2 ڪروڙ ماڻهو غربت جي لڪير کان هيٺ ويا، اڄ فرح گوگي جي اربين رپين جي ڪرپشن جون ڪهاڻيون هر شهري جي زبان تي آهن، فرح گوگي کي فرنٽ پرسن بڻائي قوم جا اربين رپيا ڦرڻ جو حساب ڏيڻو پوندو، ڪشمير فروشي تي پاڪستان ۽ ڪشمير جي عوام عمران نيازي کي ڪڏهن معاف نه ڪندي، عمران نيازي جي خلاف ڪنهن سازش نه ڪئي، عمران نيازي پاڻ تمام وڏو سازشي آهي، عوام تنگ اچي عمران نيازي کي اقتدار کان ٻاهر اڇلايو. اهڙن خيالن جو اظهار هن لاهور پريس ڪلب ۾ صحافين سان ڳالهائيندي ڪيو. اطلاعات واري وفاقي وزير چيو ته اڄ اهي پنهنجي بدزباني سان پاڪستان جي عوام کي پيغام ڏئي رهيا آهن، عمران خان اڄ به هڪ تقرير ۾ پنهنجي اندر جي غلاظت ٻاهر ڪڍي جيڪا پاڪستان جي عوام به ڏٺي، جيڪڏهن پاڪستان جي نوجوانن جي تربيت عمران خان جي هٿان ٿي ته والدين هينئر کان ئي توبهه شروع ڪري ڇڏين. هن چيو ته جهڙي قسم جي ذهنيت ۽ غلاظت اتان اچي ٿي منهنجو خيال نه آهي ته ڪي به والدين چاهيندا ته انهن جي ٻارن جي تربيت هڪ اهڙو شخص ڪري جنهن جي پنهنجي تربيت ۾ کوٽ هجي. مريم اورنگزيب چيو ته اڄ ڪنٽينر تي بيهي هو ڪافر ٿيڻ ۽ غداري جي فتويٰ ورهائي رهيو هو، هو فتويٰ ان لاءِ ورهائڻ وڃي رهيو هو ته ڪير کانئس سندس چار سالا ڪارڪردگي جو نه پڇي وٺي، چار سال هن پاڪستان جي عوام لاءِ ڇا ڪيو آهي؟ چار سال هي اقتدار ۾ رهيا ۽ رڳو الزام هنيا، جيڪڏهن ڪنهن غلط ڪم ڪيو هو ته ان عرصي ۾ انهن حصاب ڇو نه ورتو؟ عوام سوال ڪري ٿي ته عمران خان ثبوت فراهم ڪري پنهنجي هنيل الزامن کي ثابت ڇو نه ڪيو. وفاقي وزير چيو ته عمران خان کي شهباز شريف جي وزارت عظميٰ جي ڪرسي تي پارليامينٽ ۽ عوام جي ذريعي ويهڻ جو ڏک کائي رهيو آهي. مريم اورنگزيب چيو ته آئيني طريقي سان هڪ نااهل، چور ۽ ڪرپٽ وزيراعظم کي بي اعتمادي رٿ ذريعي گهر موڪليو ويو. هن چيو ته پي ٽي آءِ جي ڪنهن ميمبر شهباز شريف کي وزارت عظميٰ جي لاءِ ووٽ ناهي ڏنو، عمران خان جا اتحادي سندس چوري، ڪرپشن ۽ ڪوڙ ڳالهائڻ جي ڪري کيس ڇڏي ويا. هن چيو ته عمران خان پنهنجي چار سالن ۾ مافياز ۽ ڪارٽلز سان گڏجي اٽو، بجلي ۽ گئس، کنڊ ۽ گيهه چوري ڪيو، نوجوانن کي بيروزگار ڪيو. مريم اورنگزيب چيو ته عمران خان ڪشڪول کڻي در در ڦرندو رهيو، ان جي ابتڙ شهباز شريف ڪشڪول ٽوڙي دوست ملڪن ڏانهن ويو ته اسان کي پاڪستان جي عوام لاءِ منصوبا گهرجن، شهباز شريف توهان جهڙن ڀڪارين وانگر پنهنجي ملڪ جي عزت کي لتاڙيندي هٿ ناهي پکيڙيو، اهو ئي توهان ۽ شهباز شريف ۾ فرق آهي. هن چيو ته عمران خان ڪوويڊ جا پئسا به نه ڇڏيا، عوام کي رسوا ڪيو، انهن وٽ گهر جي ڪرائي جا پئسا به نه ڇڏيا، چار سال ۾ 16 سيڪڙو مهانگائي جو ذميوار عمران خان آهي، زندگي جي ضرورتن جي سمورين بنيادي شين جي قيمتن ۾ اضافي جو ذميوار عمران خان آهي. مريم اورنگزيب چيو ته عمران خان کي خبر هئي ته بي اعتمادي رٿ ڪامياب ٿي ويندي انهي لاءِ هو مارچ ۾ عوام تي مهانگائي ۽ قرضن جو بار ڇڏي ويو. چار سال ڪارٽلز ۽ مافيا عوام کي ڦريندا رهيا جنهن جي ڪري بجلي جي قيمت 11 رپيا يونٽ مان 24 رپيا في يونٽ ٿي، گئس 600 رپين مان 1400 رپيا، ڊي اي پي جي ٻوري 2600 مان 10000 رپيا ٿي. هن چيو ته عمران خان چار سالن ۾ 43 هزار ارب رپين جو قرض ورتو، 60 لک ماڻهو بيروزگار ٿيا، 2 ڪروڙ ماڻهو غربت جي لڪير کان هيٺ ويا، عمران خان عوام وٽ مائيڪ کڻي وڃو، توهان جي منهن تي چماٽ لڳندي، جيڪو بار عوام تي وڌو آهي، ان جو جواب عمران خان کي ڏيڻو پوندو. مريم اورنگزيب چيو ته هر طرف کان سوال ٿي رهيو آهي ته فرح گوگي ڪير هئي جنهن پنجاب کي ٻنهي هٿن سان ڦريو، فرح گوگي اربين کربين جا پئسا کڻي فرار آهي، اهو وقت پري نه آهي جن عمران خان جي چوڻ تي ۽ عمران خان جي بي نامين ملڪ کي ڦريو، انهن کان ڦريل رقم جو حساب ورتو ويندو، چون ٿا اسان سان سازش ٿي، عمران خان ڪهڙو ائٽم بم ٺاهيو هو جو آمريڪا ان جي خلاف سازش ڪندو، عمران خان ملڪ جي عوام کي بيروزگار ڪيو، ڪشمير فروشي ڪئي، جيڪڏهن ڪنهن ملڪ جي خلاف سازش ڪئي آهي ته اها عمران خان ڪئي آهي، جولاءِ ۾ چيو ته سازش ٿي آهي پوءِ مارچ تائين خاموش ڇو رهيا؟ هن چيو ته عوام انهن جهڙن چورن، نااهلن کي ووٽ ذريعي ٻاهر اڇلايو آهي، شهباز شريف اڍائي هفتن ۾ عوام کي اهو ڏنو جيڪو اهي چار سال نه ڏئي سگهيا، عوام راولپنڊي فيض آباد کان ايئرپورٽ چار چار هزار رپيا ڪرايو ڏئي ويندي هئي، اڄ اهي ميٽرو ۾ سستو سفر ڪري ايئرپورٽ پهچي وڃن ٿا، عمران خان عوام کي ميٽرو جي اهم منصوبي کان محروم رکيو، عوام کي لوڊشيڊنگ جي عذاب ۾ مبتلا ڪيو، جڏهن اسان اقتدار سنڀاليو ته 27 پاور پلانٽ فيول جي عدم دستيابي ۽ عدم مرمت جي ڪري بند هئا، انهن نه فيول خريد ڪيو نه پاور پلانٽس جي مرمت ڪئي، اسان 7 مئي جو واعدو ڪيو هو، ٻارڻ جو بندوبست ٿيڻ شروع ٿي چڪو آهي، بجلي جي لوڊشيڊنگ ۾ عوام کي ريليف ملندو. مريم اورنگزيب چيو ته جيڪڏهن پاڪستان جي نوجوانن کي روزگار ملندو ته عمران خان کي جوتن جو هار ملندو، عمران خان کي خبر آهي ته جيڪڏهن عوام کي سهولت ملندي ته سندس گلي ۾ جوتن جا هار وڌا ويندا. هن چيو ته عمران خان هڪ آڱر کڻندو ته ٽي آڱريون سندس طرف به اٿنديون. عمران خان عوام کي چوي ٿو ته خوني مارچ ٿيندو، خوني مارچ جي قانون اجازت نه ٿو ڏي، اهي پنهنجي نالائقي ۽ پنهنجي ڪارڪردگي کي لڪائڻ جي ڪري اهڙا بيان ڏئي رهيا آهن، جيڪو وقت انهن جي هٿ مان گذري ويو آهي ان تي هو ماتم ڪري رهيا آهن، انهي جي ڪري هو خوني مارچ جهڙا بيان ڏئي رهيا آهن. وفاقي وزير چيو ته عمران خان چوندو هو ته مودي اليڪشن کٽي ته ڪشمير جو مسئلو حل ٿي ويندو پر جڏهن مودي اليڪشن کٽي ته عمران خان ڪشمير فروشي ڪئي، ڪشمير ۽ پاڪستان جي عوام کيس معاف نه ڪندي. اطلاعات واري وفاقي وزير چيو ته عمران نيازي اربين رپين جي مني لانڊرنگ ڪري اليڪشن ڪميشن ۾ جواب نه ڏنو، جڏهن اليڪشن ڪميشن جواب گهريو، اهي گاريون ڏين ٿا، عدالتون آئين جي تحفظ لاءِ کليون ته عمران خان عدالتن کي گاريون ڏي ٿو، سندس سياست گار کان شروع ۽ گار تي ختم ٿئي ٿي. هن چيو ته اڄ نوجوان پڇي رهيا آهن ته توهان چار سال ڪرپشن جو الزام هڻندا رهيا پر ثابت ڪجهه نه ڪري سگهيا. وزيراعظم هائوس ۾ ايسيٽ ميڪنگ يونٽ توهان جي لاءِ اثاثا ٺاهيندو رهيو، ٻين تي گاڏين جا الزام هڻندا رهيا پر گاڏيون توهان پاڻ کڻي ويا، نوجوان سوال ڪن ٿا ته ڪيستائين ڪوڙ ڳالهائيندا، اڄ نوجوان هڪ ڪروڙ نوڪرين جو حساب گهري رهيا آهن جنهن جو واعدو عمران خان ڪيو هو. عمران خان ڪشڪول کڻي ملڪ کي ڀڪاري بڻايو، عوام ان جو حساب گهري رهي آهي. هن چيو ته عمران خان مديني جي رياست تي سياست ڪئي، ان کانپوءِ ڪرپشن تي سياست ڪئي ۽ ان کانپوءِ سازش جو ڍونگ رچايو. هن چيو ته سازش جي حوالي سان ڪميشن جي رپورٽ کانپوءِ سڀ ڪجهه واضح ٿي ويندو. مريم اورنگزيب چيو ته اسان کي ميڊيا کي هيڏانهن هوڏانهن ڪرڻ جي ضرورت نه آهي، ميڊيا عمران خان جي سمورن ڪوڙن کي ڏيکاري رهي آهي، جيترو ڪوڙ عمران خان ڳالهائيندو ان ۾ فائدو اسان جو آهي. اطلاعات واري وفاقي وزير چيو ته پريس ڪلب جو جمهوري عمل ۾ اهم ڪردار آهي، گذريل 4 سالا دور ۾ جڏهن سينسرشپ ۽ صحافت تي پابنديون هنيون ويون، ڪيترائي پروگرام بند ڪيا ۽ ڪيترن ئي صحافين جي زبان بندي ڪئي وئي، صحافين تي تشدد ڪيو ويو، جمهوريت جي لاءِ ڪردار ادا ڪندڙ صحافين جي جذبي کي خراج تحسين پيش ڪريان ٿي. هن چيو ته هو پريس ڪلب جي دعوت تي نه پر پاڻ آئي آهي، صحافي برادري کي خاطري ڪرايان ٿي ته انهن جا مسئلا ترجيحي بنيادن تي حل ڪيا ويندا. هن چيو ته جڏهن به جمهوريت تي راتاهو هنيو وڃي ٿو پريس ڪلب واحد جڳهه آهي جتي سموريون جمهوري پارٽيون اچي پنهنجو اظهار خيال ڪن ٿيون. هن چيو ته گذريل چار سال اپوزيشن، پارليامينٽ ۽ ميڊيا جي زبان بندي ڪئي وئي، سينسرشپ ڪئي وئي، ميديا جا ڪيترائي پروگرامز بند ڪيا ويا، صحافين کي انهن جي گهرن جي ٻاهران گوليون هنيون ويون، اسان انهن سمورن صحافين سان گڏ بيٺل رهياسين. هن چيو ته اظهار راءِ تي پابندي جي خلاف اسان جو سفر بيٽ رپورٽرز، ڪئميره مينن ۽ ورڪنگ جرنلسٽس سميت سموري ميڊيا سان گڏ هو، نيب ڪورٽ، ڪوٽ لکپت، اڊيالا جيل جي ٻاهر ميڊيا سدائين موجود رهي ۽ اسان جو آواز عوام تائين پهچائڻ ۾ اهم ڪردار ادا ڪيو. هن چيو ته تنقيد بهتري جي لاءِ هجي ته سدائين ان کي قبول ڪيو آهي، انهي تنقيد کانپوءِ بهتري به آندي آهي. هن چيو ته عمران خان جي دور ۾ ميڊيا، پارليامينٽ جي زبان بندي ڪئي وئي. مريم اورنگزيب چيو ته پريس ڪلب جي مسئلن کان آگاهه آهيان، سيڪريٽري انفارميشن، پي آءِ او انهن جا مسئلا نوٽ ڪري ورتا آهن جن کي جلد حل ڪيو ويندو.

مضمون کا ماخذ : quina prêmio acumulado

متعلقہ مضامین