کورونا وائرس دے خلاف جنگ پوری قوم دی مدد نال ہی جتی ونج سگدی اے ، غریب طبقہ دا دھیان رکھنڑ ساریں توں وڈا چیلنج وزیراعظم عمران خان دا پارلیمانی رہنماواں دی کانفرنس نال ویڈیو لنک دے ذریعے خطاب

اسلام آباد ۔ 25 مارچ (اے پی پی) وزیراعظم عمران خان آکھیے جو کورونا وائرس دے خلاف جنگ پوری قوم دی مدد نال ہی جتی ونج سگدی اے ، کورونا دے خلاف جنگ اچ غریب طبقہ دا دھیان رکھنڑ ساریں توں وڈا چیلنج اے ، ٹرانسپورٹ دی بندش نال مسئلے پیدا تھی سگدن ، ڈر تے گبھراہٹ اچ کیتے ونجنڑ آلے فیصلیں نال مثبت نتیجے کائنی آندے ،گزریل ڈینھ تئیں پاکستان اچ کورونا دے 900 مصدقہ مریض ہن جیں اچ صرف 153 مقامی ہن، ودھ سارے متاثرین باہرلے ملکاں توں آئے ، ملک اچ کورونا وائرس توں متاثر تھیونڑ آلیں دی تعداد بہوں گھٹ اے ۔اے گال انہاں بدھ کوں پارلیمانی رہنماواں دی کانفرنس نال ویڈیو لنک دے ذریعے خطاب کریندے ہوئیں آکھی اے ۔انہاں آکھیے جو ملک اچ کورونا وائرس کوں کھنڈنڑ توں روکنڑ دے ھوالے نال شرکا کوں ڈساونڑ چاہندا ، 15 فروری کوں کورونا وائرس متعلق اجلاس منعقد کیتا، ایں ویلھے صرف چین اچ وائرس کھنڈیا ہئی چین نال رابچے اچ رہیے۔ انہاں آکھیے جو چین اچ زیر تعلیم پاکستانی طلباءکوں چین اچ رکھنڑ دا اوکھا فیصلہ کیتا اے طلباءچین دے شہر ووہان اچ پھیے پئے ہن ،انہاں طالب علماں دے والدین انہاں کوں واپس سڈنڑ دی اپیل کیتی انہاں طالب علماں کوں اتھاں گھن آتے حاجی کیمپاں اچ رکھنڑ دا منصوبہ ہئی تاں جو اے وبا دے کھنڈنڑ دا خطرہ ہئی ۔ چین توں حالی ہک وی کورونا کیس پاکستان اچ کائنی آیا۔ وزیراعظم آکھیے جو چین دے بعد ایران اچ کورونا وائرس کھنڈنڑ شروع تھیا ، چین دے مقابلے اچ ایران اچ کورونا دے خلاف صلاحیت بہوں گھٹ ہئی تے انہاں ڈے سکریننگ تے قرنطینہ دیاں سہولتاں وی موجود کائناں ہن ، تفتان بارڈر تے زائرین دی وڈی تعداد جمع تھی گئی، 28 فروری کوں ڈاکٹر ظفر مرزا کوں تفتان بارڈرتے بھیجا انہاں اتھاں دی موجودہ صورت حال دا جائزہ گھدا ۔ وزیراعلیٰ بلوچستان جام کمال نال وی رابطے اچ رہیے ، پاک فوج دے تعاون نال تفتان بارڈر تے زائرین کوں ہر ممکن سہولتاں ڈتیاں ۔ عمران خان آکھیے جو ہنڑ تئیں ایئرپورٹس تے9 لکھ لوکاں دی سکریننگ کیتی گئی اے ،گزریل ڈینھ تئیں پاکستان اچ کورونا دے 900 مصدقہ مریض ہن ، پاکستان اچ کورونا دے صرف 153 مقامی مریض ہن، ودھ سارے متاثرین باہرلے ملکاں توں آئے انہاں آکھیے جو قومی سلامتی کمیٹی دا اجلاس اوں ویلھے سڈیا جڈاں ملک اچ کورونا دے مریضاں دی تعداد 21 ہئی جیں دے بعد یونیورسٹیز، کالجز، کرکٹ میچز اتے عوامی اجتماع آلیاں جہیں کوں وختی بند کرڈتا ۔انہاں آکھیے جو خیبرپختونخوا، سندھ، پنجاب اتے بلوچستان صوبائی سطح تے مختلف قسم دا لاک ڈاﺅن کیتے ،18ویں ترمیم دے بعد اے صوبیں دا اختیار اے ۔ انہاںآکھیے جو پاکستان اچ لاک ڈاﺅن دے معاملے تے کنفیوژن اے، اساکوں ٹرانسپورٹ بند کرنڑ آلے لاک ڈاﺅن تے ولا غور کرنڑاں چاہیدے ، ٹرانسپورٹ دی بندش نال ملک اچ مکتلف مسلیں پیدا تھی سگدن ، گلگت بلتستان اچ ٹرانسپورٹ دی بندش نال تیل گھٹ تھی گئے ، ملک اچ ایں ویلھے کنڑنک دی کٹائی دا سیزن اے ، ٹرانسپورٹ دی بندش نال مختلف مسئلے پیدا تھی سگدن ۔انہاں آکھیے جو کل نیشنل کوآرڈینیشن کمیٹی اچ وفاق اپنڑاں موقف پیش کریسی تے اجلاس اچ ملک اچ کورونا پاروں پیدا تھیونڑ آلی مجموعی صورت حال دا جائزہ گھن تے نویں حکمت عملی وضع کیتی ویسی ۔

مضمون کا ماخذ : اسکریچ کارڈ کا انعام

متعلقہ مضامین