پاکستان تے ایران دا آزاد تجارتی معاہدے کوں وختی حتمی شکل ݙیوݨ، ݙوپاسے تجارت پنج سال اچ 10 ارب ڈالر تئیں ودھاوݨ تے اتفاق ، ایران دے صدر ڈاکٹر سیّد ابراہیم رئیسی دا دورہ مکمل تھیوݨ تے مشترکہ بیان جاری

اسلام آباد۔24اپریل(اے پی پی) پاکستان تے ایران دا آزاد تجارتی معاہدے کوں وختی حتمی شکل ݙیوݨ تے مشترکہ اقتصادی منصوبیں، مشترکہ سرحدی منڈیاں دے قیام، اقتصادی فری زونز دے ذریعے اتے نویاں سرحداں کوں کھول تے آپݨی ݙوپاسے تجارت کوں اڳلے پنج سالاں اچ 10 ارب ڈالر تئیں ودھاوݨ تے اتفاق کیتے ، وزیراعظم محمد شہباز شریف اتے ایران دے صدر ڈاکٹر سیّد ابراہیم رئیسی وچال وفد دی سطح تے ݙو پاسے تعلقات اتے تعاون تے ڳالھ مہاڑ کیتی ڳئی جنہاں وزیر خارجہ امیر عبداللہیان، کابینہ دے ٻئے ارکان تے اعلیٰ حکام سودھے ھک اعلیٰ سطحی وفد دے رلے 22 توں 24 اپریل تئیں پاکستان دا سرکاری دورہ کیتے۔ ݙوہیں ملکاں مشترکہ سرحد کوں ’’امن دی سرحد‘‘توں ’’خوشحالی دی سرحد‘‘اچ بدالݨ تے اتفاق کریندے ہوئیں توانائی دے شعبے اچ تعاون دی اہمیت دا اعادہ کیتے۔ ایران دے صدر ڈاکٹر سیّد ابراہیم رئیسی دے دورہ مکمل تھیوݨ تے دفتر خارجہ توں جاری مشترکہ بیان اچ آکھیا ڳئے جو فریقین ھک طویل مدتی پائیدار اقتصادی شراکت داری اتے سانجھے تعاون تے مبنی علاقائی اقتصادی اتے رابطے دے ماڈل خاص طور تے ایران دے سیستان بلوچستان اتے پاکستان دے بلوچستان صوبیں اچ سماجی و اقتصادی ترقی دی لوڑھ تے زور ݙتے ۔ فریقین پاکستان ایران ݙوپاسے تعلقات دے سارے پہلواں دا جائزہ گھنݨ دے نال سانجھی تشویش دے علاقائی تے عالمی امور تے ڳالھ مہاڑ کیتی تے ٻہوں سارے معاہدیں تے دستخط کیتن ۔ پاکستان اتے ایران علمی، ثقافتی تے سیاحتی سرگرمیاں کوں ودھارا ݙیوݨ تے تاریخی مذہبی جہیں دی سیاحت کوں ودھارا ݙے تے ݙوطرفہ برادرانہ تعلقات کوں مزید مستحکم کرݨ دا عزم کیتے ۔ بیان موجب ݙوہیں رہنماواں دہشت گردی، منشیات تے انسانی سمگلنگ، یرغمال بݨاوݨ، منی لانڈرنگ اتے اغوا جیہے خطریں نال نبݨݨ سانڳے ݙوہیں ملکاں دے سیاسی، فوجی اتے سکیورٹی حکام وچال باقاعدہ تعاون تے ڳالھ مہاڑ دی اہمیت دا اعادہ کیتے ۔ فریقین آزاد تجارتی معاہدے (ایف ٹی اے) کوں تکھے حتمی شکل ݙیوݨ سانڳے سالانہ ݙوہیں پاسوں سیاسی مشاورت (بی پی سی) اتے جوائنٹ بزنس ٹریڈ کمیٹی (جے بی ٹی سی) دے اڳلے اجلاساں دے نال مشترکہ اقتصادی کمیشن (جے ای سی) دے مذاکرات دے 22 ویں دور کوں وختی کراوݨ تے اتفاق کیتے۔ بیان موجب انہاں اقتصادی تعاون کوں تکھا کرݨ سانڳے اقتصادی اتے تکنیکی ماہرین دے علاوہ ݙوہیں ملکاں دے چیمبرز آف کامرس دے وفد دے باقاعدہ تبادلے دی سہولت ݙیوݨ تے وی اتفاق کیتے۔ ٹی آئی آر دے تحت ریمدان بارڈر پوائنٹ کوں بین الاقوامی سرحدی کراسنگ پوائنٹ قرار ݙیوݨ تے بقایا ݙو بارڈر مارکیٹاں کھولݨ تے اتفاق کیتے ۔ اقتصادی اتے تجارتی سرگرمیاں اچ سہولت ݙیوݨ سانڳے فریقین وچال بارٹر ٹریڈ میکانزم کوں مکمل طور تے فعال کرݨ خاص طور تے جاری تعاون دیاں کوششاں دے تحت بارڈر اسٹیننس مارکیٹس تے اتفاق رائے پاتا ڳئے ، رابطے دے حوالے نال فریقین ٹی آئی آرکنونشن دے تحت سامان دی باقاعدہ ترسیل تے اطمینان دا اظہار کیتے تے مزید موثر، تکھی رفتار تے رکاوٹاں توں پاک تجارت سانڳے کنونشن کوں مکمل طور تے فعال کرݨ تے اتفاق کیتے۔ ݙوہیں ملکاں مشترکہ سرحد کوں ’’امن دی سرحد‘‘نال ’’خوشحالی دی سرحد‘‘اچ بدالݨ تے اتفاق کریندے ہوئیں توانائی دے شعبے اچ تعاون دی اہمیت دا اعادہ کیتے جیں اچ بجلی دی ترسیل اتے ایران پاکستان گیس پائپ لائن منصوبے شامل ہن۔بیان اچ مزید آکھیا ڳئے ݙوہیں ملکاں بیلٹ اینڈ روڈ انیشی ایٹو (بی آر آئی) اتے اقتصادی تعاون تنظیم (ای سی او) دے ارکان دے طور تے رابطے، انفراسٹرکچر دی ترقی اتے توانائی دے شعبیں اچ تعاون ودھاوݨ دے پختہ عزم دا اظہار کیتے اتے گوادر تے چاہ بہار بندرگاہواں وچال رابطے ودھاوݨ تے اتفاق کیتے ۔ ݙوہیں ملکاں دہشت گردی دی ساریاں شکلاں تے مظہر دی مذمت کریندے ہوئیں ایں خطرے دا مقابلہ کرݨ سانڳے سانجھے تعاون تے وی مبنی نقطہ نظر اپناوݨ تے خطرے نال مؤثر طریقے نال نبݨم تے ایندا مقابلہ کرݨ سانڳے موجودہ ݙوطرفہ ادارہ جاتی میکانزم خاص طور تے اقوام متحدہ دے چارٹر دے اصولاں دی مکمل پاسداری کریندے ہوئیں رکن ملکاں دی خودمختاری اتے علاقائی سالمیت دے اصول توں فیدہ چاوݨ تے اتفاق کیتے ۔ وزیر اعظم شہباز شریف اتے صدر ابراہیم رئیسی اقوام متحدہ، ای سی او، ایس سی او، او آئی سی، ڈی ایٹ آرگنائزیشن فار اکنامک کوآپریشن، ایشیا کوآپریشن ڈائیلاگ (اے سی ڈی) اتے افغانستان دے پڑوسی ملکاں دے وزراء خارجہ دے اجلاس سودھے ٻئے کثیر الجہتی فورمز تے ݙوہیں ملکاں وچال تعاون دی ساری جہتاں دا خیرمقدم کیتے ۔ انہاں ای سی او اچ آزاد تجارت تے مذاکرات شروع کرݨ تے وی اتفاق کیتے۔ بیان موجب صدر رئیسی لاہور اچ علامہ اقبال دے مزار تے حاضری ݙیندے ہوئیں علامہ محمد اقبال کوں خراج عقیدت پیش کیتے۔ کراچی اچ انہاں مزار قائد تے پھلاں دی چادر چڑھاوݨ دی تقریب اچ شرکت کیتی ۔ انہاں کراچی اچ ݙوہیں ملکاں دے تاجراں دے ھک وݙے اجلاس توں وی خطاب کیتا ۔ صدر رئیسی پاکستان دے صدر اتے وزیراعظم کوں ایران دے سرکاری دوریں دی دعوت وی ݙتی۔

مضمون کا ماخذ : بک آف ڈیڈ

متعلقہ مضامین