حکومت پاکستان خصوصی لوکاں کوں زندگی دے ہر شعبے اچ برابر دے حقوق اتے حصہ ݙیوݨ کیتے کوشاں اے، وزیراعظم محمدشہبازشریف داخصوصی لوک / باہم معذوری دے عالمی ݙینھ تے پیغام

اسلام آباد۔3دسمبر (اے پی پی):وزیراعظم محمدشہبازشریف آکھیے جو حکومت پاکستان خصوصی خصوصی لوکاں کوں زندگی دے ہر شعبے اچ برابر دے حقوق اتے حصہ ݙیوݨ کیتے کوشاں اے۔سرکاری اتے نجی ݙوہیں شعبیں کوں خصوصی لوکاں دی بہتری کیتے رل تے کم کرݨا ہوسی ۔ وزیراعظم اے ڳالھ خصوصی لوک / باہم معذوری دے عالمی ݙینھ دے موقع تے آپݨے پیغام اچ آکھی اے ۔ وزیراعظم آکھیے اڄ پاکستان تے پوری دنیا اچ خصوصی لوکاں دا جگ ݙیھاڑ منایا ویندا پئے ۔ اڄ دے ݙینھ اساں سارے خصوصی لوکاں دیاں کوششاں تے جدوجہد دی تعریف کریندوں جیڑھے جو سارے چیلنجز دے باوجود اپݨی اتے آپݨے خانداناں دی زندگی بہتر بݨاوݨ کیتے کوشاں ہن ۔ وزیراعظم آکھیے جو خصوصی لوکاں دیاں کاوشاں اساں ساریں کیتے ھک مثال ہن ،کوئی وی ملک اتے معاشرہ خصوصی لوک یا مختلف صلاحیتاں دے حامل لوکاں کوں زندگی دے سارے شعبیں اچ رلائے بغیر ترقی نی کرسڳدا ۔ انہاں آکھیے اساں اے یقینی بݨدیندے پیوں جو خصوصی لوکاں کوں صحت،تعلیم ،روزگار، ٹرانسپورٹ اتے ووٹ دے حق سودھے ٻئے سارے حقوق میسر ہوون تے ہر سہولت تئیں انہاں دی ھکو سویں رسائی ہووے ۔وزیراعظم آکھیے سرکاری اتے نجی سیکٹرز ݙوہیں کوں خصوصی لوکاں دی بہتری کیتی رل تے کم کرݨا ہوسی۔ میڈیا کوں خصوصی لوکاں دی ضروریات اتے حقوق دے حوالے نال آگاہی ݙیوݨ اچ کردار نبھاوݨا چاہیدے ۔ وزیراعظم آکھیے آو سارے رل تے اڄ دے ݙینھ اساں عہد کروں جو خصوصی لوکاں کوں معاشرے دا فعال شہری بݨاوݨ تے انہاں کوں قومی دھارے اچ بھرپور شامل کرݨ کیتے اساں آپݨا آپݨا کردار ادا کریندے رہ ویسوں ۔

مضمون کا ماخذ : لوٹومینیا اکومولڈا

متعلقہ مضامین