پاکستان اچ سیلاب توں ٻہوں تباہی تھئی اے ، متاثرین دی بحالی نویں سروں تعمیر کیتے وݙے پیمانے تے امداد دی لوڑھ اے ، وزیراعظم شہباز شریف دا بین الاقوامی کانفرنس توں خطاب

جنیوا۔9جنوری(اے پی پی) وزیراعظم محمد شہباز شریف آکھیے پاکستان اچ سیلاب توں وݙے پیمانے تے تباہی تھئی، سیلاب توں نہ صرف انفراسٹرکچر تباہ تھئے بلکہ ملکی معیشت وی ٻہوں متاثر تھئی ، لکھاں گھر سیلاب اچ وڑھ ڳئن ، تعلیمی ادارے تباہ تھی ڳئے اتے زراعت مک ڳئی اے ، اوکھے ویلھے مدد کرݨ آلے ملکاں کوں پاکستان نہ بھلیسی ، سیلاب متاثرین دی نویں سروں تعمیر تے بحالی کیتے وݙے پیمانے تے امداد دی لوڑھ اے ۔ اے ڳالھ انہاں سنوار کوں سیلاب متاثر علاقیں دی نویں سروں تعمیر تے بحالی دے حوالے نال’’ کلائمیٹ ریزیلیئنٹ پاکستان‘‘ بین الاقوامی کانفرنس دے افتتاحی سیشن توں خطاب کریندے ہوئیں آکھی اے ۔ وزیراعظم آکھیے کانفرنس دی میزبانی تے ایندے توں خطاب کرݨ میں کیتے اعزاز اے، میکوں خوشی اے جو اقوام متحدہ دے سیکرٹری انتونیو گوتریس میݙے نال ایں کانفرنس دی مشترکہ صدارت کریندے پئن جیویں سیلاب توں بعد انہاں پاکستان دے عوام دے احساسات دی ترجمانی کیتی تے مشکلات کوں چاتا ایں تے پاکستان دے عوام دی طرفوں انہاں دا شکریہ ادا کرینداں ۔ سیلاب دے بعد اقوام متحدہ دے سیکرٹری جنرل سندھ تے بلوچستان سودھے سیلاب توں شدید متاثرہ علاقیں دا دورہ کیتا تے تے وݙے پیمانے تے تھیوݨ آلی تباہی دا خود جائزہ ڳھدا ، پاکستان دے سیلاب متاثرہ عوام اوکھے ویلھے انہاں دے کردار اتے خدمات کوں ہمیشہ یاد رکھیسن ۔ وزیراعظم آکھیے پاکستان اچ سیلاب توں وݙے پیمانے تے تباہی تھئی ، 33 ملین لوک ودھ سارے متاثر تھئن جݙاں جو ٻالاں سودھے 1700 لوک سیلاب اچ جاں بحق تھئن ، سیلابی ریلے اچ کئی لکھ گھر تے ہزاراں کلومیٹر سڑکاں وھہہ ڳئن ، 10لکھ ٻالڑیاں سودھے 26 لکھ ٻالاں دا تعلیمی سلسلہ منقطع تھی ڳئے ، اوکھے ویلھے اقوام متحدہ، ورلڈ بینک، ایشیائی ترقیاتی بینک، مشرق وسطیٰ، مشرق بعید اتے یورپی ملکاں سودھے دنیا دے ٻہوں سارے ملکاں ساݙی مدد کیتی میں سبھیں دا شکریہ ادا کرینداں۔ وزیراعظم شہباز شریف آکھیے پاکستان ہݨ تئیں سیلاب توں تھیوݨ آلی تباہی توں ٻہر نی نکلیا جو متاثرہ علاقیں اچ ریلیف دا کم جاری اے ، بلوچستان ، سندھ دے کئی علاقیں اچ حالی وی سیلاب دا پاݨی کھڑے اینکوں کڈھݨ باقی اے، انفراسٹرکچر دی بحالی تے تعمیر نو دی ضرورت اے، انہاں آکھیے کھڑے پاݨی توں زراعت شدید متاثر تھئی اے تے فصلاں کاشت نی تھی سڳیاں اساکوں متاثرہ خانداناں کوں آپݨے پیراں تے کھڑا کرݨا اے تے روزگار کماوݨ دے قابل بݨِاوݨاں اے ۔ وزیراعظم آکھیے سیلاب توں تھیوݨ آلی تباہی دا تخمینہ 30 ارب ڈالر لاتا ڳئے جیڑھا جو پاکستان دے جی ڈی پی دا 8 فیصد اے، 90 لکھ لوک غربت دی دلدل اچ پھس ڳئن ۔ انہاں آکھیے جو پاکستان دی حکومت متاثرین دی فوری مدد اتے بحالی کیتے سارے وسائل بروئے کار گھن آوے، 20 ہزار ٹروپس، سینکڑاں ہیلی کاپٹرز اتے کشتیاں ریسکیو آپریشن اچ حصہ ڳھدا متاثرہ علاقیں اچ پھتے عوام کوں محفوظ جاہ تے منتقل کیتا، 2.7 ملین خانداناں کوں 400 ملین ڈالر دی کیش گرانٹ ݙتی ویندی پئی اے ۔ وزیراعظم آکھیے او کانفرنس دے سارے شرکاء دا شکریہ ادا کریندن ، انہاں پاکستانی عوام دا ݙکھ، درد محسوس کیتا۔ وزیراعظم آکھیے اڄ اساں تاریخ دے اہم موڑ تے کھڑوں ، پاکستان کوں سیلاب توں تھیوݨ آلی تباہی پاروں ٻہوں سارے چیلنجز درپیش ہن ، سیلاب متاثرین دیاں زندگیاں بدل ڳن ، حکومت انہاں دی ریکوری، بحالی تے نویں سروں تعمیر کیتے جامع منصوبہ تشکیل ݙتے، اساکوں ایں سلسلے اچ عالمی برادری دی مدد درکار اے، سیلاب توں تھیوݨ آلی تباہی پاروں پاکستان دی معاشی ترقی دی رفتار وی بری طرح متاثر تھئی اے ، پاکستان کلھا ایں تباہی توں تھیوݨ آلے اثرات نال نئیں نبݨ سڳدا ، انہاں ایں توقع دا اظہار کیتے جو اوکھی صورت حال اچ عالمی برادری پاکستان دی بھرپور مدد کریسی۔

مضمون کا ماخذ : بہت سے نتائج

متعلقہ مضامین