مدینہ منورہ۔13دسمبر(اے پی پی) حکومت پاکستان مدینہ منورہ دے گورنر شہزادہ فیصل بن سلمان بن عبدالعزیز السعود کوں سول ایوارڈ ہلال پاکستان نال نوازیے ۔ اے ایوارڈ شہزادہ فیصل بن سلمان بن عبدالعزیز السعود دی پاکستان سانڳے خدمات دے اعتراف اچ ݙتا ڳئے ۔ سعودی عرب اچ پاکستان دے سفیر احمد فاروق گورنر آفس مدینہ منورہ اچ منعقدہ تقریب اچ شہزادہ فیصل کوں ایوارڈ پیش کیتا۔ ایں موقع تے پاکستان دے سفیرآکھیے اے ایوارڈ پاکستان اتے سعودی عرب وچال تکڑے بھرپی آلے تعلقات اتے سانجھی پاکستانی عوام سعودی شاہی خاندان اتے خادم الحرمین الشریفین نال ٻہوں عقیدت رکھیندن ۔ شہزادہ فیصل بن سلمان ایوارڈ نال نوازݨ تے پاکستانی عوام دا شکریہ ادا کریندے ہوئیں آکھیے جو ݙوہیں ملکاں تاریخی، ثقافتی اتے مذہبی رشتے اچ گھنڈیے پئن تے اے برادرانہ تعلقات ویلھے دی ہرآزمائش اچ پورے لتھن ۔ انہاں آکھیے جو سعودی عرب انہاں تعلقات کوں ہر سطح تے قائم رکھیسی ۔ شہزادہ فیصل بن سلمان بن عبدالعزیز السعود پاکستان اچ سلطانہ فاؤنڈیشن سودھے مختلف فلاحی اتے ترقیاتی اداریں نال سرگرم عمل رہین ۔ 1990 توں ایں فاؤنڈیشن دے زیر انتظام سکولاں توں ھک لکھ 20 ہزار توں ودھ طلباء فارغ التحصیل تھی چکن۔ مدینہ المنورہ دے گورنر دی حیثیت نال شہزادہ فیصل سعودی عرب اچ پاکستانی افرادی قوت کوں سہولت ݙیوݨ اچ اہم کردار ادا کیتے ۔