افواج پاکستان، رینجرز ، ایف سی، این ڈی ایم اے تے ٻئے اداریں نال رل تے خدمات انجام ݙیندے پیوں ، جی ایچ کیو اچ تھیوݨ آلی 6 ستمبر دی تقریب منسوخ کرݙتی ڳئی اے، ڈی جی آئی ایس پی آر میجر جنرل بابر افتخار دی پریس کانفرنس

اسلام آباد۔3ستمبر (اے پی پی):مسلح افواج دے ترجمان میجر جنرل بابر افتخار آکھیے جو افواج پاکستان، رینجرز ، ایف سی، این ڈی ایم اے تے ٻئے اداریں نال رل تے خدمات انجام ݙیندے پیوں ، پاکستان ائیر فورس دی طرفوں متاثرین سیلاب کوں خوراک اتے بنیادی ضرورت چیزاں ݙتیاں ڳئن تے پاکستان نیوی 10 ہزار سیلاب متاثرین کوں ریسکیو کیتے ۔ جی ایچ کیو اچ تھیوݨ آلی 6 ستمبر دی تقریب منسوخ کرݙتی ڳئی اے ۔ ، ہفتے کوں اتھاں پریس کانفرنس توں خطاب کریندے ہوئیں ڈی جی آئی ایس پی آر میجر جنرل بابر افتخار اڄوکے مینھ توں پیدا تھیوݨ آلیں مسلئیں دے شروع توں ہی افواجِ پاکستان اپݨے بھینݨ بھراویں دی مدد کیتے متاثرہ علاقیں اچ پچھلے2مہینے توں ݙینھ رات مصروفِ عمل ہن۔افواجِ پاکستان دا ہر ھک سپاہی اتے آفیسر اینکوں ڈیوٹی دی بجائے ھک مقدس فریضہ سمجھ تے عوام دے مسئلیں کوں گھٹ کرݨ کیتے کوشاں اے۔ایہو او جذبہ ہئی جیں دے تحت گزریل مہینے لیفٹیننٹ جنرل سرفرازعلی، میجر جنرل امجد حنیف، بریگیڈئیر محمد خالد، میجر سعید احمد، میجر محمد طلحہٰ منان اتے نائیک مدثر فیاض بلوچستان دے علاقے لسبیلہ (وِندر) اچ سیلاب توں متاثرہ اپݨے بھراویں دی مدد کیتے دوران ہیلی کاپٹر حادثے اچ جام شہادت نوش کیتا۔انہاں آکھیے جو جولائی تے اگست اچ تھیوݨ آلی کور کمانڈرز کانفرنس اچ وی سیلاب متاثرین دی ہر ممکن مدد کرݨ دا عزم کیتا ڳئے ایں حوالے نال آرمی چیف خصوصی ہدایات ݙتن ۔ آرمی چیف دی ہدایات موجب اوکھے ویلھے اساں عوام کوں کلھا نہ چھوڑیسوں بھاویں ایں کیتے کتنا ویلھا کیوں نہ لڳے ۔ آرمی دی سطح تے کمانڈر آرمی ائیر ڈیفنس کمانڈ دی سر براہی اچ آرمی فلڈ ریلیف کوآرڈینیشن سینٹرقائم کیتا ڳئے کمانڈر آرمی ائیر ڈیفنس کمانڈ نیشنل فلم رسپانس اینڈ کوآرڈینیشن سینٹر دے کوآڈینیٹردے فرائض وی انجام ݙیندے پئن ،ریلیف، ریسکیو اینڈ ری ہیبلیٹشن دے تحت افواجِ پاکستان سول ایڈمنسٹریشن، ڈیزاسٹر مینجمنٹ اتھارٹیزاتے ٻئے فلاحی اداریں دے نال رل تے ھک جامع حکمت عملی دے تحت خدمات انجام ݙیندے پئن۔ انہاں آکھیے جو آرمی چیف سندھ، بلوچستان،خیبر پختونخوا اتے پنجاب دے سیلاب توں متاثرہ علاقیں دے تفصیلی دورے کیتے اتے اتھاں جاری امدادی کارروائیاں دا جائزہ وی ڳھدے ۔ سیلاب توں متاثرہ علاقیں اچ پاکستان آرمی دیاں ساریاں فارمیشنز اتے سینئر کمانڈرز موجود ہن تے امدادی کارروائیاں اچ مصروفِ عمل ہن۔میجر جنرل بابر افتخار ݙسایا جو پاکستان آرمی ایوی ایشن دے ہیلی کاپٹرز مسلسل متاثرہ علاقیں اچ مصروف ہن۔ ہݨ تئیں 276 ہیلی کاپٹر پروازواں مختلف علاقیں اچ چلائیاں ڳئن۔خراب موسم اتے ٻئے چیلنجزدے باوجودپاکستان آرمی ایوی ایشن دے پائلٹس آپݨیاں جاناں کوں خطرے اچ پاتے نا صرف لوکاں کوں ریسکیو کیتے بلکہ انہاں تئیں ضروری ریلیف سامان دی دستیابی کوں وی یقینی بݨائے ، کہیں وی ہنگامی صورتحال اچ کے پی کے دی ہیلپ لائن1125جݙاں جو باقی صوبیں کیتے آرمی ہیلپ لائن1135تے رابطہ کیتا ونج سڳدے ایں ویلھے پورے ملک اچ 147 ریلیف کیمپس اچ 50ہزار توں ودھ متاثرین کوں ریلیف ݙتا ڳئے 250میڈیکل کیمپس جیں اچ آرمی ڈاکٹرز، نرسنگ اتے پیرامیڈیکس سٹاف ہݨ تئیں 83ہزار توں ودھ مریضاں کوں فری طبی امداد ݙتی اے ایں توں علاوہ سندھ کیتے آرمی دے اضافی میڈیکل اتے ریسکیو انجینئرزکوں وی بھیجا ڳئے ۔ ڈی جی آئی ایس پی آر ݙسایا جو آرمی سیلاب متاثرین کیتے 3ݙینھ دا راشن جیڑھا جو تقریبا ً1685ٹن اتے کثیر تعداد اچ ٹینٹس وی سیلاب توں متاثرہ خانداناں اچ تقسیم کیتے ڳئن ۔ملک اچ 284 فلڈ ریلیف کیمپس قائم کیتے ڳئن انہاں اچ 2294ٹن راشن جݙاں جو 311 ٹن توں ودھ ضروریات ِ زندگی دیاں بنیادی چیزاں تے 10لکھ70ہزارتوں ودھ دوائیں پورے پاکستان دے لوکاں جمع کروائن ۔

مضمون کا ماخذ : apostas dupla sena

متعلقہ مضامین